Муус устар 14 күнүгэр, биһиги быыстапкабыт саалыгар Саха республикатын норуотун маастара, Саха Республикатын Бочуоттаах бэтэрээнэ, сатабыллаах иистэнньэҥ Анна Николаевна Слепцова 85 сааһын көрсө төрөөбүт дойдутун бар дьонугар — “Өбүгэм үгэһэ — олоҕум аргыһа” диэн айар үлэтин көрдөрөр быыстапка үөрүүлээх быһыыга-майгыга арылынна.
Быыстапканы иилээн-саҕалаан ыытта Хатырыктааҕы сынньалаҥ Киинин директора Алена Ефремова.
Үгүс кэлбит кэлбит ыалдьыттар, ол курдук, «Нам улууһа» МТ баһылыга Юрий Слепцов, «Нам улууһа» МТ культураҕа уонна духовнай сайдыыга салайааччыта Семен Ядрихинскай, РФ культуратын үтүөлээх үлэһитэ, норуот искусствотын уонна уус-уран оҥоһуктарын «Симэх» национальнай Киин директора Яна Игнатьева, СР культуратын туйгуна, РФ, СР норуотун маастара, педагог-маастар, үлэ бэтэрээнэ Татьяна Шишигина, П.П. Ядрихинскай — Бэдьээлэ аатынан улуустааҕы Олоҥхо дьиэтин салайааччыта Вера Колпашникова, Анна Слепцова аймах-билэ дьонноро уо.д.а. үтүө-мааны эҕэрдэ тыллары тиэртилэр.
Анна Слепцова өр сыллаах айымньылаах үлэтэ сыаналанан, «Нам улууһун Ытык киһитэ», «СР Бочуоттаах кырдьаҕаһа», «Нам улууһун культуратын сайдыытыгар кылаатын иһин» бэлиэлэринэн наҕараадаланна.
Бу үөрүүлээх түгэн, эҕэрдэлэр кэннилэриттэн быыстапка кыһыл лиэнтэтин «Нам улууһа» МТ баһылыга Юрий Слепцов, Анна Николаевна бэйэтэ уонна кини кыыһа Н. Ларионова быстылар.
Анна Николаевнаҕа кытаанах доруобуйаны, уһун үйэлээх олоҕу, айар үлэтигэр үгүс ситиһиилэри, дьолу, тапталы баҕарабыт!
