Балаҕан ыйын 1 күнүгэр Россияҕа саҥа үөрэх дьыла саҕаланар. Үгэс быһыытынан оскуолаларга бырааһынньыктааҕы линиэйкэлэр, билии уруоктара, кылаас чаастара ыытыллаллар. Бу күн хас биирдиибитигэр өрүү буоларын курдук олус күндү уонна кэтэһиилээх бырааһынньык.
Оҕолорго, үөрэнээччилэргэ анаан М.К. Аммосов аатынан культура уонна духуобунай сайдыы дыбарыаһыгар баар тэрилтэлэр араас хайысхалаах оонньуулары тэрийэн ыыттылар. Ол курдук, Пушкинскай каартанан хайдах туттарга, хайдах регистрацияланарга тустаах тэрилтэлэр баҕалаах оҕолору үөрэттилэр. Н.М. Рыкунов аатынан оҕо библиотекатыгар «Билии күлүүһүн арыйыы» диэн станцияларынан квест-оонньууга улахан кылаас оҕолоро көхтөөхтүк оонньоотулар. П.И. Сивцев аатынан Намнааҕы история уонна этнография музейыгар «Төрөөбүт кыраай» диэн тест-викторинаҕа бэрт интэриэһиргээн кытыннылар, улуус историятыттан билистилэр. Манна даҕатан этэххэ, бу күн музейга быыстапка турар саалатыгар ый устата билии күнүгэр аналлаах быыстапка арылынна. Бу күнү түмүктүүр тэрээһин Н. А. Шестаков аатынан сынньалаҥ киин киэҥ уораҕайыгар уоттаах-күөстээх, оонньуулаах-көтүүлээх кэнсиэр буолла. Бу тэрээһиннэргэ ордук Намнааҕы 2-с N-дээх, Хамаҕаттатааҕы Саха-францзускай, Хатыҥ-Арыы орто оскуолаларыттан кылаас салайааччылара оҕолорун аҕалан эбии билиини иҥэрдилэр, итиэннэ сэргэхситэн, үөрдэн-көтүтэн Билии күнүн атаардылар.
М. Петрова
