П.И. Сивцев аатынан Намнааҕы история уонна этнография түмэлигэр үс өрүттээх, баай ис хоһоонноох, духуобунай сыаннаһы сайыннарыыга сыһыаннаах сөбүлэҥ түһэрсиитэ биир улахан историческай түгэнинэн буолла.
Инникитин үлэ күүһүгэр киирэригэр Нам улууһун баһылыга Юрий Слепцов, “Саха сирин тутааччыларын сойууһа” генеральнай директора Айхал Габышев, Россия наукаларын академиятын Сибиирдээҕи салаатын Гуманитарнай чинчийии уонна аҕыйах ахсааннаах омуктар кыһалҕаларын үөрэтэр институт салайааччыта Сардаана Боякова илии баттаһан бигэргэттилэр.
Үөрүүлээх түгэн салайааччылара чинчийии, үөрэтии хайысхатыгар элбэх үлэ эрэйиллэрин бэлиэтээтилэр. Үп-харчы өттүгэр кыһарыйар боппуруостары, харчынан өйөөһүнү «Нам улууһа» МТ уонна “Саха сирин тутааччыларын сойууһа” ылыналларын туһунан санааларын эттилэр.
Бу сөбүлэҥ чэрчитинэн аҥардас киэн туттар дьоммутун үөрэтиинэн эрэ муҥурдаммакка, бу эйгэҕэ үлэлээччилэр “Саха сиригэр бөдөҥ тутуулар түҥ былыргыттан бааллара” диэн этиини дакаастыырга болҕомтолорун ууруохтара. Онон сөбүлэҥ биир күүһэ – саха омук тутууга сыстаҕаһын, мындырын көрдөрөр сыаллаах-соруктаах. Итиннэ сигэнэн “Туймаада ыһыаҕа” архитектурнай этнографическай комплекс салайааччыта Вильям Яковлев-Түһүлгэн билиһиннэрбитинэн, инникитин Нам Партизаныгар Мымах кинээс хайдах дьаһанан олорбутун көрдөрөр парк тутуллан олоххо киириэхтээх. Онон инникитин духуобунай сайдыыга биһиги улууспут саҥа, сонун, сүүрээни киллэриигэ олук уурда.
М. Петрова