Кулун тутар 28 күнүгэр айар дьоҕурдаах, талба талааннаах Далбар Хотун Елизавета Иннокентьевна Сабарайкина сырдык кэриэһигэр анаммыт тэрээһин буолла. Тэрээһин бастакы чааһыгар Елизавета Иннокентьевна оҕолоро уонна сиэннэрэ хомуйан оҥорбут «КҮН САРДАҤАТЫНАН ӨРҮҮ СҮРЭХПИТИГЭР» диэн кинигэ сүрэхтэниитэ буолла. Кинигэ сүрэхтэниитин Александр Копырин иилээн-саҕалаан ыытта.Нам улууһун культуратын салалтатын салайааччыта Семен Ядрихинскай эҕэрдэ тылын эттэ, ону таһынан кинигэҕэ ахтыы биэрбит чугас дьонноро эҕэрдэ уонна махтал тылларын эттилэр, истиҥ ахтыылары оҥордулар. Тэрээһини ырыа куттаах А.Ф. Шестаков аатынан народнай Дьиэ сүрүннүүр үлэһитэ Маайа Григорьева бэйэтин матыыбыгар икки ырыатын бэлэх уунна, дьон кэрэхсибилин ылла. Елизавета Иннокентьевна улахан кыыһа Туйаара Сабарайкина ийэтин олорбут олоҕун кэрчиктэрин дьоҥҥо-сэргэҕэ хаартыскаларынан билиһиннэрдэ, кыра кыыһа Евдокия Егорова ийэлэрин сөбүлүүр дьарыгын, дьиэтин таһыгар олордубут үүнээйилэрин дьоҥҥо күөх экран нөҥүө көрдөрөн кэпсээтэ.
Ол кэннэ, тэрээһиммит иккис чааһыгар, Елизавета Иннокентьевна олоҕун тухары дьарык оҥостубут, кини айар талаанын сырдатар, аатын үйэтитэр сыалтан кини үлэлэрин бу оҕолоро, сиэннэрэ мунньан, ийэлэригэр, эбэлэригэр анаан тэрийбит «Ийэбит олоҕун оհуордаах суола» диэн олус киһини сөхтөрөр, кэрэ, баай оҥоһуктардаах быыстапка арыллыыта буолла. Манна үөрүүлээх быһыыга-майгыга кыһыл лиэнтэни быстылар Нам улууһун культуратын салалтатыттан Матрена Платонова. Елизавета Иннокентьевна улахан кыыһа Туйаара Сабарайкина уонна сиэнэ Айтал Егоров. Кэлбит ыалдьыттарга быыстапка ис хоһоонун орто кыыһа Светлана Сабарайкина, сиэннэрэ Уйгулаана уонна Айтал кэпсээтилэр.
Бу курдук, бэрт интэриэһинэй быыстапка турда.
Наммыт дьонун-сэргэтин Нам түмэлин быыстапкалыыр саалатыгар «Ийэбит олоҕун оհуордаах суола» диэн быыстапканы кэлэн көрөргүтүгэр ыҥырабыт!
Быыстапка биир нэдиэлэ устата муус устар 8 күнүгэр дылы туруоҕа. Киирии билиэт сыаната 50 солк.