Бүгүн Нам түмэлигэр илии тутуурдаах ыалдьыттар кэлэн бардылар. Родион Никитич Никитин уонна Светалан Егоровна Винокурова «Дьоруойдар хорсун быһыылара умнуллуо суохтаах» диэн өйдөбүнньүк альбом туттардылар. Бу альбомҥа муус устар 11-13 күннэригэр Нам улууһун спордун ветераннара (Степанов Николай Николаевич, Никитин Родион Никитич, Винокурова Светлана Егоровна, Охлопков Семен Михайлович, Корякина Лена Прокопьевна, Трофимов Егор Николаевич) уонна эдэр кыттааччылар (Сыромятникова Саина, Софронова Дария, Гаврильев Валентин) НАМ-БАТАМАЙ-СИЭГЭН КҮӨЛ маршрутунан марафонскай сүүрүүнү тэрийэн кыттыбыттарын туһунан суруллар, ону туоһулуур хаартыскалар киирбиттэр. Бу тэрээһини быйыл марафонскай сүүрүү 10 сылыгар, Российскай милииссийэ 300 сылыгар, Саха сирин уонна Ленскэй комсомол 100 сылларыгар анаабыттар. Марафон маршрутун талыы мээнэҕэ буолбатах, ол курдук, сүрүн сыала-соруга Саха сиригэр буолан ааспыт гражданскай сэрии кэмигэр Василий Белянкин уонна кини Кыһыл этэрээтэ (балартан Нам дьонноро: Егоров Николай Спиридонович, Эверстов Егор Егорович, Петров Афанасий Николаевич) үрүҥнэр тоһуурдарыгар түбэспит сирдэрин көрүү, кинилэр ааттарын үйэтитии буолар.
Нам улууһун спордун историятыгар суолталаах хамсааһыны оҥорбуккутугар, улахан тэрээһини тэрийэн, бэлиэтээһиннэргитин сурукка киллэрэн тиһэн, хаартыскалаан бигэргэтэн оҥорбут альбомҥут үйэ-саас тухары биһиги түмэлбит библиотекатыгар хараллан сытыа, инники көлүөнэ дьоно-сэргэтэ көрүө-истиэ, үөрэтиэ диэн эрэллээхпит.
Маны таһынан, Дьячковскай Афанасий Васильевич кэлэн ыалдьыттаата. Билэргит курдук, түмэлбит спорду сырдатар саалатыгар Афанасий Васильевичка анаан муннук оҥорбуппут. Онон сибээстээн, кэнники 2 сылга ылбыт бэйэтин наҕараадаларын аҕалан туттартаата.
Күндү дьоммутугар түмэл ааттыттан истиҥ махталбытын тиэрдэбит!
