Сэтинньи 7 күнүгэр эбиэттэн киэһэ Намнааҕы түмэл саалата оҕо-аймах саҥатынан туолла. Бу күн кинилэргэ анаан Норуоттар сомоҕоһууларын күнүн түмэл үлэһиттэрэ, төрөппүттэрэ тэрийэн ыыттылар.
Бастаан Норуоттар сомоҕоһууларын күнэ тэриллибит историятын, суолтатын, киэҥ нэлэмэн Россиябытыгар 190 тахса элбэх араас тылынан саҥалаах, традициялаах омуктар биир иллээх дьиэ-кэргэн буолан олороллорун туһунан түмэл үлэһиттэрэ сырдаттылар. А.Ф. Шестаков аатынан культура дьиэтин Дмитрий Барабанов салайааччылаах “Коробейники” нуучча ырыатын ансаамбыла эҕэрдэ ырыаларын ыллаан тэрээһиммитин арыйдылар.
Салгыы бырааһынньыгы оҕолор бэйэлэрэ көҕүлүттэн туттулар. Манна 2-с №-х Намнааҕы орто оскуола, Н.С. Охлопков аатынан улуустааҕы гимназия 6 кылааһын оҕолоро, З.П. Винокуров аатынан Намнааҕы оҕо искусствотын оскуолатын учууталлара уонна үөрэнээччилэрэ көхтөөхтүк кытыннылар. Ветеран учуутал Зинаида Данхановна сүбэтинэн оҕолор эрдэ бэлэмнэнэргэ дьиэтээҕи сорудах ылбыттара. Ол чэрчитинэн талбыт омуктарын олоҕун, абыычайдарын үөрэтэн, ол туһунан бэртээхэй, киэҥ ис хоһоонноох презентациялары бэлэмнээбиттэр. Осетин, хотугу норуоттар, сахалар, тывалар национальнай таҥастарын таҥнан тэтимнээх үҥкүүлэри толордулар, бэйэлэрэ астаан аҕалбыт пловтарын, шашлыктарын, блиныларын, тыва омук туустаах чэйин үөрэ-көтө үллэстэн амсайдылар. Тэрээһиҥҥэ оҕолор төрөппүттэрэ дьоһун көмөнү оҥорбуттар. Оҕолор элбэх квест-оонньууларга көхтөөхтүк кытыннылар, активнайдар минньигэс призтары тутан үөрдүлэр. Маннык интириэһинэй тэрээһиҥҥэ кыттыбыттарын туһунан Туоһу суруктары туттулар.
Оҕолор олус интириэһинэй тэрээһин, астынныбыт, өссө да кыттыахпыт диэн санааларын эттилэр. Тэрээһиҥҥэ уопсайа 40-чэ оҕо көхтөөхтүк кытынна, түмүккэ өйдөбүнньүк хаартыскаҕа түстүлэр. Түгэнинэн туһанан оҕолору кытта тэҥҥэ сүүрбүт-көппүт учууталларга Илона Георгиевна Обутоваҕа, Айталина Николаевна Кузнецоваҕа уонна оҕолор сонун-сэргэх, тэтимнээх үҥкүүлэрин туруорбут хореографтарыгар Надежда Федоровна Москвитинаҕа уонна Саргылана Семеновна Кудринаҕа истиҥ махталбытын тиэрдэбит.
Тэрээһинтэн сырдатта музей сотруднига А.С. Заболоцкая.
07.11.2025
