Бэҕэһээ, муус устар 30 күнүгэр, П.И.Сивцев аатынан историко-этнографическай музей, улуустааҕы А.Ф.Шестаков аатынан норуот айымньытын дьиэтин, П.П.Ядрихинскай-Бэдьээлэ аатынан олонхо дьиэтин специалистара, ССРС култууратын, СӨ норуот хаһаайыстыбатын үтүөлээх үлэһитэ, Нам улууһун Ытык киһитэ Мария Николаевна Габышева уонна культура ветерана Людмила Дмитриевна Рехлясова кыттыылаах, быйыл республикабытыгар биллэриллибит Культура сылын чэрчитинэн, Дьокуускай куоракка баар “Счастье” пансионат олохтоохторугар анаан Киноконцерт көрдөрөн кэллилэр.
Бу пансионакка 30-н тахса сыл устата Эҥсиэли хочотун Культуратын эйгэтигэр кэрэни-үтүөнү тарҕаппыт, кини сайдарыгар дьоһун кылаатын киллэрсибит, бүтүн олоҕун анаабыт, киэн туттар ветераммыт Александра Иннокентьевна Олесова олорор.
Александра Иннокентьевнаны Мария Николаевна Габышева, Нам улууһун культуратын үлэһиттэрин профсознай комитета, билигин үлэлии сылдьар эдэр көлүөнэ үлэһиттэрин ааттарыттан А.Ф.Шестаков аатынан норуот айымньытын дьиэтин специалиһэ Туяра Романовна Петрова уонна Людмила Дмитриевна Рехлясова бөҕө доруобуйаны баҕаран туран Культура сылынан истиҥник эҕэрдэлээн сэмэй бэлэхтэрин туттардылар.
Онтон П.И.Сивцев аатынан историко-этнографическай музей специалистара киновидеоархив фондатыттан А.И. Олесова урукку сылларга үлэлээбит, концердаабыт түгэннэриттэн тыыннаах кадрдарынан киноконцерт таҥан-оҥорон көрдөрдүлэр, фотоальбом оҥорон бэлэх ууннулар. Техническай өттүгэр П.П. Ядрихинскай-Бэдьээлэ аатынан олонхо дьиэтин специалиһэ Сергей Юрьевич Акимбетов көмөтүнэн баҕа хоту таһымнаахтык ааста.
Александра Иннокентьевна эдэр сааһын, үөлээннээхтэрин тыыннаах мөссүөннэрин көрөн олус уйадыйда, культуратын үлэһиттэрэ маннык кэрэ бэлэх оҥорон олус үөрдүбүттэрин, кинини өрүү саныы-махтана сылдьалларыттан истиҥ махталын эттэ. Пансионат олохтоохторо бииргэ олорор дьүөгэлэрин эдэр сааһын, кини элбэх өрүттээх улахан талаанын көрөн итэҕэйдилэр, сөхтүлэр, улаханнык астыммыттарын уонна махталларын эттилэр.
Музей специалиһа А.С.Заболоцкая.
30.04.2026
