Күһүн бүтэһик, сир хатыыр кэмигэр – алтынньы 23 күнүгэр киэргэммит Уус түһүлгэтигэр дьон үмүөрүһэ муһуннулар. Икки оһох кутаа уотун кыһыл кыымнара тыал сайа охсоруттан халлааҥҥа көтөн иһэн мэлийэллэр…
Бу көстүүнү ыраахтан-чугастан кэлбит ыалдьыттар, кыттааччылар күһүҥҥү хаарынан бүрүллүбүт түһүлгэҕэ тугу эрэ саҥаны көрөөрү-билээри үөрэ-көтө хааман киирдилэр…
Тэрээһин сиэр быһыытынан Нам Олоҥхо Дьиэтин эдэр алгысчыта Владимир Сыромятников уот иччитигэр сүгүрүйэн алгыс сиэрин-туомун ыытыытыттан саҕаланна.
Улуус баһылыга Юрий Иннокентьевич Слепцов, культура министерствотыттан Вера Афанасьевна Моисеева, улуус культураҕа уонна духуобунаска сайдыытын салайааччыта Семен Прокопьевич Ядрихинскай, Россия уонна Саха сирин норуодунай маастара Роман Ильич Готовцев – Мындыр Уус эҕэрдэ тылларын мустубут дьоҥҥо эттилэр. Нам улууһугар былыргы ньыманан тимири уһаарыыны сөргүтүүгэ улахан оруолу оҥорбут Таастаах нэһилиэгин олохтооҕун Василий Иванович Герасимовы махтанан эҕэрдэлээтилэр, Саха сирин өрөспүүбүлүкэтин культуратын наставнига, Нам улууһун уонна түмэлин сайдыытыгар кылаатын иһин түөскэ анньыллар знактарынан наҕараадалаатылар. Ону таһынан, Нам уустарыгар махтал суруктары туттартаатылар.
Таастаах баһылыга Аргунов Сергей Иванович көмөтүнэн бу тэрээһин кэмигэр саха сүөһүтүн идэһэҕэ туттан, кэлбит ыалдьыттарга күөс өрөн күндүлээтилэр, саха сүөһүтүн этин амсаттылар. Сүөһүнү идэһэҕэ туттуох иннинэ сиэрин-туомун өрөспүүбүлүкэтээҕи норуот айымньытын дьиэтиттэн ыыттылар.
Тэрээһин кэмигэр киһи сүргэтэ көтөҕүллэр ырыатын Иннокентий Татаринов бэлэх уунна, уонна тэтимнээхтик, өрө көтүтүүүлээхтик дьон тоҥмутун ириэрэн оһуохайдатта.
Икки оһоҕунан уһаарыллан 10 киилэ болгуо тимир ылылынна. Үөһээ-Бүлүү Чабын уонна Бүлүү улууһун уустара булаат буһарыытыгар, Мэҥэ-Хаҥалас улууһуттан тар оҥоруутугар, Руслан Захаров туой иһиккэ күөс өрүүтүгэр маастар кылаастары көрдөрдүлэр. Кэлбит дьон тимир болгуо оһохтон тахсарын күүтэ таарыйа, Таастаах нэһилиэгин сынньалаҥ киинин үлэһиттэрэ тэрийбит оҕунан ытыыга күрэхтэригэр кытыннылар. Манна 1 миэстэни Илья Заболоцкай, 2-с миэстэни Александр Данилов, 3-с миэстэни Эдуард Тарабукин ыллылар. Кыайыылаахтар саха сүөһүтүн этинэн наҕараадаланнылар.
Бу үөрүүлээх күн биир сүрүннүүр тэрээһинэ – “Бастыҥ бадаайы” күрэх бэрт көхтөөхтүк, тэтимнээхтик ааста. Үөһээ-Бүлүүттэн, Бүлүүттэн, Горнайтан, Дьокуускайтан, Томпоттон, Кэбээйиттэн, Намтан кыттааччылар кэлбиттэр. Уустар бэйэлэрэ оҥорбут бадаайыларынан тургутук аастылар. Тыҥааһыннаах күрэх кэннэ 1 миэстэҕэ Винокуров Андрей Андреевич (I Хомустаах, Нам), 2-кэ Слепцов Виталий Архипович (Хатырык, Нам), 3 миэстэҕэ Лукин Егор Васильевич (Горнай) тигистилэр. Маны таныһан тэрийээччилэр анал бириистэрин хаһаайыннарынан буоллулар: Үөһээ-Бүлүүттэн Тумусов Егор Сысоевич – “Биһирэбиллээх уус”; Бүлүүттэн Саввинов Федор Григорьевич – “Бастыҥ булаат буһарааччы”; Томпо улууһуттан Захаров Альберт Альбертович – “Инникилээх уус”.
Бу курдук, чуҥкуйан турбут Уустар түһүлгэлэрэ, урукку курдук толору дьонунан туолан, бу күн олуһун диэн сэргэхсийдэ…