Нам улууһун ветераннарын Советын председателэ Софья Дмитриевна Кобякова көҕүлээһининэн Намнааҕы П.И. Сивцев аатынан история уонна этнография музейыгар иккис аан дойду сэриитэ бүппүт күнүгэр аналлаах тэрээһин буолан ааста. Тэрээһиҥҥэ сэрии хартыыналарыттан киинэ көрдүлэр, ол кэннэ музей сотруднига Рустам Федоров Ржевка сэрии панораматын саалатыгар дириҥ ис хоһоонноох интириэһинэй бэсиэдэ оҥордо. Тэрээһиҥҥэ тыыл ветераннара Е.Фиофанов, П.Тимофеев, сэрии сылын оҕото Е.Нуестроева кыттыыны ыллылар, ахтыы оҥордулар. Япония уонна Корея сэриитин кыттыылаахтарын оҕолоро Е.Прокопьева, У.Охлопкова, В.Прокопьева, М.Новгородова, А.Гоголева аҕаларын туһунан кэпсээтилэр. С.Кобякова ахтыы оҥорбут дьоҥҥо сэмэй бэлэх туттартаата. Түмүккэ уопсай хаартыскаҕа түстүлэр.
