Бүгүн биһиги түмэлбитигэр үөрүүлээх түгэн буолан ааста. Ыраах Абый улууһуттан ыалдьыттар: Абый улууһун культуратын начальнига Новикова Жанна Карловна, Муҥурдаах нэһилиэгин краеведческай түмэлин салайааччыта Сорокоумова Анастасия Гаврильевна уонна билигин Абый улууһугар культура управлениятыгар специалиһынан үлэлии сылдьар, биһиги биир дойдулаахпыт Чиркова Валентина Ивановна кэлэн бардылар. Кинилэр сыаллара диэн, эрдэ кэпсэтии түмүгүнэн, Нам улууһун дьонугар үрүҥ көмүс сирэйдээх ыҥыыры көрдөрүүгэ аҕаллылар. Бу ыҥыыр бэрт интэриэһинэй историялаах. Бэйэлээтэр бэйэбит киһибит, Торуой Модут нэһилиэгин кулубатын уонна ыстаарыстатын Михаил Петрович Эверстов ыҥыыра буолар. (“Михаил Петрович Эверстов (1801-02.12.1861) — голова и староста 2-го Модутского наслега Намского улуса, прослуживший обществу 25 лет, за службу от царя награжден кортиком и получил от Св. Синода благославление Намской Предченской церкви, от своего общества получил 2 аттестата”). Бу ыҥыыр ыраах Абый улууһугар хайдах тиийбитэ биллибэт.
Бүгүҥҥү көрсүһүүгэ Нам улууһун культуратын начальнига Заровняева Елена Александровна, Модут нэһилиэгин аҕа баһылыга Сокольников Петр Григорьевич уонна Эверстов Михаил Петрович сыдьааннара Пермякова (Тихонова) Елизавета Никоновна оҕолоро сиэннэрэ кыттыыны ыллылар.
Күндү Нам улууһун дьоно-сэргэтэ! Абый улууһун Муҥурдаах нэһилиэгин түмэлин экспонаттарын уонна биир сэдэх, биһиги улууспут историятыгар бигэ сыһыаннаах экспонатын – ҮРҮҤ КӨМҮС СИРЭЙДЭЭХ ЫҤЫЫРЫ кэлэн көрөргүтүгэр ыҥырабыт! Ону таһынан, Михаил Эверстов аймахтарын, Модут нэһилиэгиттэн ытык маллар бу быытсапкаҕа көрдөрүүгэ тахсыахтара. Бу түгэни мүччү тутумаҥ! Быыстапка балаҕан ыйын 15 күнүгэр дылы туруоҕа.
Бүтэhик хаартыскаҕа Михаил Эверстов туттарбыт Таҥара дьиэтэ (Бөтүҥ нэhилиэгэ)
