Бүгүн, кулун тутар 15 күнүгэр, биһиги конференц-заалбытыгар СР культуратын туйгуна, РФ худуһунньуктарын союһун чилиэнэ, Ньурба улууһун Үөдэй нэһилиэгин норуотун маастара Яна Петровна Орлова үбүлүөйдээх 60 сааһынан «Ииһим абылаҥар ылларан» өр сыллаах айымньылаах айар, уран үлэтин көрдөрөр дьоро түһүлгэтэ тэрилиннэ.
Үөрүүлээх түһүлгэни Арчы дьиэтин «Күн дьоно» этнофольклорнай бөлөх салайааччыта, саха норуотун ырыаларын, тойуктарын тарҕатааччы, уһуйааччы СР культуратын туйгуна Евдокия Ивановна Павлова — Кылыһах Далбар тойуктаан уонна Мария — Маайа Григорьева салайааччылаах А.Ф. Шестаков аатынан улуустааҕы норуот айымньытын дьиэтин «Нам кылыһах» төрүт дорҕоон бөлөҕө арыйдылар.
Бу бүгүҥҥү үөрүүлээх күҥҥэ Яна Петровнаны эҕэрдэлээтилэр Хомустаах 1-кы нэһилиэгин МТ баһылыга Василий Гаврильевич Жирков, I Хомустаах нэһилиэгин «Алгыс» норуот айымньытын Киинин директора Анна Григорьевна Мылаханова, «Мичээр» үҥкүү народнай ансамбылын салайааччыта Татьяна Филипповна Филиппова, «Сайдыы» оҕо айымньытын дьиэтин үлэһиттэрэ уонна директора Анастасия Николаевна Винокурова, «Нам улууһа» МТ культура уонна духовнай сайдыы Салалтатын специалиһа Матрена Анатольевна Платонова, ону таһынан Мэҥэ-Хаҥалас Төҥүлүтүттэн, Уус-Алдан Чараҥыттан, Ньурба улууһуттан, Амма улууһуттан дьүөгэлэрэ, уо. д. а.
Үбүлүөйдээх түһүлгэ биир кэрэхсибиллээх түгэнинэн буолла Яна Петровна тикпит кэрэ көстүүлээх, былыргылыы моһуоннаах оноолоох соннорун көрдөрдүү — Мэҥэ-Хаҥалас Төҥүлү нэһилэгиттэн, Уус-Алдан Чараҥыттан, Амма улууһун Чакырыттан уонна Нам улууһуттан кэрэ аҥардар, Далбар Хотуттар. Ыалдьыттар бу дефилены көрөн сөхтүлэр-махтайдылар, үгүс үөрүүнү ыллылар.
Айылҕаттан илиитигэр дьоҕурдаах Яна Петровна аҥардас үлэһит, айар-тутар эрэ буолбакка, кини өссө элбэх оҕо ийэтэ, дьиэтин түбүгүн аттаран өссө сөбүлүүр дьарыктаах, оҕолорун кэрэҕэ-сырдыкка иитэр сыаллаах. Олкурдук, 4 уол оҕо амарах ийэтэ, 8 сиэн ,1 хос сиэн тапталлаах эбээтэ. 2007 с. тулаайах оҕолору иитэр дьиэ кэргэн, быйыл 15 сылын көрүүтэ-истиитэ суох хаалбыт тулаайах оҕолору — уопсайа 24 оҕоҕну ииттэ, билиҥҥи бириэмэҕэ 7 оҕо баар, онтон 2-тэ студеннар.
Яна Петровна кыра эрдэҕиттэн уруһуйдуур, иистэнэр буолан сахалыы иискэ сыстан, нэһилиэгэр, улууска республикабыт 23 улууһугар уопсайа 200 бууктаах соннору тиктэ. Ону таһынан, I Хомустаах нэһилиэгин Александр Окоемов аатынан «Мичээр» народнай үҥкүү ансамбылыгар 1986-2007 сс. диэри араас элбэх үҥкүүлэригэ таҥастарын бэйэтэ эскизтаан тикпит. Нам селотун «Ньургуһун» народнай үҥкүү ансамбылыгар, «Добун» эр дьон ырыа ансамбылыгар, Хатыҥ-Арыы, Фрунзе нэһилиэктэрин фольклорун ансамбылларыгар, Үөдэй эр дьонун ансамбылыгар, Уус-Алдан, Өлүөхүмэ улуустарыгар ансамбылларга таҥастарын тигэн дьон биһирэбилин ылбыта.
Яна Петровна, бүгүҥҥү үтүө-мааны күҥҥэ «СР норуот уус-уран оҥоһуктарын маастара» үрдүк аатын ылла.
