Хайа да хаһыат да буоллун, кинигэ да буоллун, урукку да билиҥҥи да кэмҥэ, хаартыската суох ыстатыйа толору ис хоһоонун биэрбэт. Ол курдук, биһиги улууспутугар биир оннук киһибитинэн — хаартыска эйгэтин кэрэхсээччитинэн буолар республикаҕа биллэр дэгиттэр идэлээх журналист, «Кыhыл көмүс бөрүө» журналистар бириэмийэлэрин лауреата, фотограф — ТЕРЕНТИЙ ТЕРЕНТЬЕВИЧ ХАЛЫЕВ.
Олоҕун кэрчиктэрэ:
🔹️1936 сыл сэтинньи 27 күнүгэр Таатта оройуонун Уус-Амма нэһилиэгэр бааһынай дьиэ кэргэҥҥэ төрөөбүтэ.
🔹️1957 с. Ытык-Күөл орто оскуолатын бүтэрэр, ити кэмтэн ыла ЫБСЛКС чилиэнэ.
🔹️1957с. Таатта оройуонун “Труд” колхоһун чилиэнэ.
🔹️1957-59 сс. ити колхоз комсомольскай тэрилтэтин босхоломмут секретарынан үлэлиир.
🔹️1959 с. Ленинскэй комсомол путевкатынан Мирнэй куорат тутуутугар барар уонна 1959-60 сс. “Якуталмазтрест” ЖКХ-гар рабочайынан үлэлиир.
🔹️1961 с. ЫБСЛКС Обкомун ыҥырыытынан Аллайыаха оройуонугар баран рабочайдыыр.
🔹️1962-63 сс. Алексеевскай оройуон “Саҥа олох” хаһыатыгар фотокорунан үлэлиир.
🔹️1963-64 сс. бу оройуон П.Алексеев аатынан колхоһугар комском босхоломмут секретарынан талыллан үлэлиир.
🔹️1964-70 сс. республикатааҕы “Эдэр коммунист” хаһыат производствоҕа отделын литературнай үлэһитинэн, отдел сэбиэдиссэйинэн, 1969 сыл алтынньы 1 күнүттэн эппиэттиир секретарынан үлэлиир.
🔹️1965 с. ССРС журналистарын союһун чилиэнэ.
🔹️1970-72 сс. Аллайыаха оройуонун “Сайдыы суола” хаһыакка литературнай үлэһитинэн, эппиэттиир секретарынан, редактор эбээһинэһин толорооччуннан үлэлиир.
🔹️1972 с. ахсынньы 13 күнүттэн Нам оройуонун “Ленин суола” хаһыатыгар ыстаарсай литературнай үлэһитинэн,
🔹️1982 с. олохтоох радионан биэрии корреспонденынан үлэлиир.
🔹️1994 с. балаҕан ыйын 15 күнүгэр оһолго түбэһэн олохтон туораабыта.
Терентий Халыев Намҥа үлэлии сылдьан хаалларбыт фотоматериаллара билигин Нам улууһун историятын үөрэтиигэ көмө буолаллар.
