Мария Николаевна Габышева 1938 сыллаахха от ыйын 17 күнүгэр Уус-Алдан улууһун Баатаҕай нэһилиэгэр күн сирин көрбүтэ. Төрөппүт аҕата омугунан кэриэй этэ, ийэтэ саха. Кини олоҕун доҕорун Балыктаахха көрсөн, Нам II Хомустааҕар Габышевтар аймахха кийиит буолбута. Эдэр ыал кэргэнин дойдутугар көһөн кэлбиттэрэ, Мария Намы иккис дойду оҥостон куоракка көһүөр диэри олорбута. Идэтинэн библиотекарь, правовед (юрист). Култуура эйгэтигэр, сэбиэскэй-партийнай уорганнарга, дьахталлар уопсастыбаннай тэрилтэлэригэр үлэлээбитэ. Тоҕус төгүл норуот дьокутаатынан талыллыбыта. ССРС культуратын туйгуна, СӨ профтех. үөрэхтээһинин туйгуна, СӨ норуотун хаһаайыстыбатын үтүөлээх үлэһитэ. «Аҕа дойду иннигэр үтүөлэрин иһин» II истиэпэннээх мэтээл кавалера, Нам улууһун, Нам сэлиэнньэтин Бочуоттаах гражданина. 1993 сылтан – Cаха Өрөспүүбүлүкэтин «Тыгын Дархан» Уопсастыбаннай аһылык сулууспата» ГУП дириэктэринэн үлэлээбитэ.
«Тыгын Дархан» эмискэччи баар буола түспэтэҕэ Олоҕор тосту уларыйыы Мария Николаевнаҕа 1993 сыллаахха киирэр. Аатырбыт асчыт Иннокентий Тарбахов туруорсуутунан, кинини Намҥа өрөспүүбүлүкэ салайааччылара бэлиэтии көрөннөр, Дьокуускайга, СӨ бастакы бэрэсидьиэнэ Михаил Николаев көҕүлээһининэн аһыллыбыт «Тыгын Дархан» рестораҥҥа дириэктэринэн кэлэр. Ол эрээри, «ресторан» диэн — эттэххэ эрэ дөбөҥ. Мария Николаевна кэлэригэр манна билигин курдук мааны, үчүгэй дьиэ, биллэн турар, суоҕа. Арай баара – ону аҕа саастаах көлүөнэ өйдүүрэ буолуо – Ленин болуоссатыгар «Политпросвещение дьиэтэ». Ол «дьиэҕэ» сэбиэскэй кэмҥэ — райкомнар сэкирэтээрдэрэ, совхозтар, отделениелар салайааччылара буолуо, о.д.а. салайар каадырдар кэлэн билиилэрин-көрүүлэрин үрдэтинэллэрэ. Дьэ ол дьиэ реконструкцияланан, тупсарыллан, омук оборудованиетынан толоруллан, билигин «Тыгын Дархан» ресторан чулуута буолан турар.
Билигин Мария Николаевна бочуоттаах сынньалаҥҥа олорон республикаҕа, улууска общественай үлэҕэ көхтөөхтүк кыттар, сүбэ-ама биэрэр, бэйэтин кылаатын куруук киллэрэр.
Мария Николаевнаны үбүлүөйдээх күнүнэн итиитик-истиҥник эҕэрдэлиибит! Баҕарабыт куруук чэгиэн туругу, дьолу! Кини курдук наставниктаахпытынан, биһиги Намнар, киэн туттабыт, барҕа махталбытын тиэрдэбит.
