Намнааҕы история уонна этнография түмэлигэр сонун экспонаттары көрө, сэдэх материаллары кытта билсэ күннэтэ дьон-сэргэ экскурсияҕа кэлэр. Кулун тутар 13 күнүгэр биһиги аамыт боруогун Саха сирин ырыа эйгэтин үрдүкү чыпчаалын баһылаабыт киэн туттар дьоммут, культура үтүөлээх үлэһиттэрэ В.П. Индигирскэй, К.А. Герасимов, А.Н. Дьяконова, А.Т. Аммосова, А.В. Дьячковская ыалдьыттаатылар. Нам улууһун, саха норуотун былыргы, кэлиҥҥи, аныгы олоҕор сыһыаннаах материаллары истэн олус сэҥээрдилэр. Сиһилии кэпсээбит түмэл салайааччытыгар А.И. Копыриҥҥа истиҥник махтаннылар.
