Бүгүн, о.э. алтынньы ый 15 күнүгэр поэт, тылбаасчыт, ССРС суруйааччыларын сойууһун чилиэнэ Илья Дорофеевич Винокурова-Чаҕылҕан 110 сылынан Н.М. Рыкунов аатынан Намнааҕы киин библиотека «Ыллыктаах айан» диэн бырайыактарын чэрчитинэн Мэҥэ Хаҥалас улууһун Майа нэһилиэгэр И.М. Сосин аатынан улуустааҕы киин библиотекатыгар «Кэм тыына: Чаҕылҕан уонна Арбита» диэн холбоһуктаах тэрээһин буолла.
Киирии тылы бырайыак ааптара, Намнааҕы киин бибилэтиэкэ методиһа Наталья Павлова эттэ.
Арассыыйа суруналыыстарын, норуоттар икки ардыларынааҕы уонна СӨ суруйааччыларын сойуустарын чилиэнэ, суруналыыс, суруйааччы, «Мэҥэ аат» бэлиэ хаһаайына, Тараҕай нэһилиэгин, Майа сэлиэнньэтин, Мэҥэ Хаҥалас улууһун Бочуоттаах олохтооҕо, СӨ култууратын туйгуна Степан Марков бу күн күндү ыалдьыт буолан кэллэ. Бэлиэтээн эттэххэ, Степан Степанович ийэтэ Маркова Вера Егоровна Иван Арбита бииргэ төрөөбүт балтыта. Степан Степанович Иван Арбита туһунан истиҥник бу күн ахтан-санаан ааста. Саха АССР култууратын үтүөлээх үлэһитэ, мелодист, артыыс, режиссер Алексей Леонтьевич Попов уола, кыраайы үөрэтээччи Борис Попов, И.М.Сосин аатынан улуустааҕы киин бибилэтиэкэ кылаабынай библиограба. “Тапталым тыала сардаҥа буолан… ” электроннай кинигэ ааптара Надежда Сидорова, Табаҕа орто оскуолатын мусуойун үлэһитэ Прасковья Макарова кыттыыны ылан Иван Арбита туһунан сиһилии кэпсээтилэр. «Добун Дорҕоон» эр дьон бөлөҕө Иван Арбита хоһооннорун аахтылар. Бэлиэтээн эттэххэ, бу хоһооннор Надежда Сидорова электроннай кинигэтигэр куйаар куодунан аудио записьтара киирбиттэрэ.
Биһиги түмэлбит Илья Чаҕылҕан аатынан салаа сэбиэдиссэйэ Анна Николаева Арбиталаах Чаҕылҕан доҕордуу буолалларын туоһулуур биллэр учуонайдар ыстатыйаларыттан иһитиннэрии оҥордо. Нам улууһун Бөтүҥ нэһилиэгин модельнай бибилэтиэкэтин сэбиэдиссэйэ Валентина Колесова уонна Хатыҥ Арыы нэһилиэгин бибилэтиэкэтин сэбиэдиссэйэ Варвара Носкова Таллан Бүрэ уонна Чаҕылҕан доҕордоһууларын туһунан кэпсээтилэр, Нам улууһун киин модельнай бибилэтиэкэтин кылаабынай библиотекара Раиса Дьяконова кыттыыны ылан «Чаҕыл уоттаах Чаҕылҕан» литература чааһын ыыттылар. Тэрээһиҥҥэ Майатааҕы В.П. Ларионов аатынан оскуола 10 «а» кылааһын үөрэнээччилэрэ көхтөөх кыттыыны ылыллар, кылаас салайааччыта Ольга Старостина. Оҕолорго анаан Намнааҕы киин бибилэтиэкэ методиһа Наталья Павлова интеллектуальнай оонньуу ыытта, үөрэнээччилэр сэргээн көхтөөхтүк кытыннылар.
Тэрээһин түмүгэр «Чаҕылҕан” диэн ааттаммыт документальнай киинэни көрдүбүт.