Бүгүн сэтинньи 7 күнүгэр, үтүө өйдөбүлүнэн хаалбыт Улуу Өктөөп күнүгэр, Надежда Ивановна уонна Афанасий Ильич Васильевтар дьиэ-кэргэн уһун кэмҥэ муспут олорон ааспыт олохпут историятын көрдөрөр киэҥ коллекциялара биһиги түмэлбитигэр «Ааспыт кэм ахтылҕана» диэн быыстапкалара үөрүүлээх быһыыга-майгыга арылынна.
Бу үөрүүлээх тэрээһини түмэл салайааччыта Александр Копырин иилээн-саҕалаан ыытта. Васильевтар дьиэ-кэргэн чугас доҕотторо, үөлээннээхтэрэ кэлэн күндү ыалдьыт буолан кыттыыны ыллылар. Нам улууһун Культуратын управлениятын аатыттан норуот маастардарын кытта үлэ сүрүннүүр эппиэтинэстээх үлэһитэ Матрена Платонова, «Иэйии» ветераннар түмсүүлэрин ааттарыттан Надежда Емельянова, Нам улууһун коллекционердарын «Ситим» түмсүү салайааччыта Мария Аманатова уонна «Строительнай» түөлбэ олохтоохторо истиҥ эҕэрдэ тылларын эттилэр. Ону тэҥэ, Лариса Данилова салайааччылаах бастакы нүөмэрдээх И.С. Гаврильев аатынан Нам орто оскуолатын үөрэнээччилэрэ — «Күндүл» литературнай-театральнай бөлөх Платон Ойуунускай «Көҥүл ырыата» диэн хоһоонун дьоһуннаахтык аахтылар, дьон кэрэхсибилин ыллылар, Дмитрий Барабанов «Аалай уоттаах сулуһум», Валерий Ноев «Кыракый уолчааным» диэн ырыаларынан киэргэттэ уонна Николай Пестряков баяҥҥа доҕуһуолугар Афанасий Васильев Иннокентий Ивановтуун Былатыан Ойуунускай тылларыгар «Былааһы сэбиэккэ» диэн ырыаны дуэттаан ыллаатылар. Бу ырыалар тэрээһини олус киэргэттилэр, кэлбит ыалдьыттар сүргэлэрэ көтөҕүллэн бары күргүөмүнэн үөрэ-көтө ылластылар.
Ол курдук, түмэлбит сырдык саалатыгар «Ааспыт кэм ахтылҕана» быыстапка арылларыгар кыһыл лиэнтэни быстылар бүгүҥҥү бэлиэ күн буруйдаахтара — коллекционер Афанасий Ильич, кини кэргэнэ Надежда Ивановна Васильевтар уонна быыстапканы иилээн-саҕалаан, дьаарыстаан туруорбут түмэл үлэһитэ — Рустам Федоров.
Күндү Нам улууһун олохтоохторо уонна ыалдьыттара! Эһигини Улуу Өктөөп күнүнэн эҕэрдэлээн туран «Ааспыт кэм ахтылҕана» диэн Надежда уонна Афанасий Васильевтар дьиэ-кэргэн коллекцияларынан саҥа быыстапканы кэлэн көрөргүтүгэр ыҥырабыт!
Быыстапка биир нэдиэлэ устата туруоҕа.