Бүгүн муус устар ый 23 күнүгэр Намнааҕы историко-этнографическай музей экспозиционнай улахан саалатыгар, музей специалиһа Анастасия Заболоцкая салайааччылаах нэһилиэктэр уонна улуус Наставниктарын сүбэтин председателлэрин уочараттаах сүбэ мунньаҕа буолан ааста.
Санатан эттэххэ Нам улууһугар Наставниктар улуустааҕы сүбэлэрэ 2023 сыл санатыгарулуус 16 нэһилиэктэригэр тэриллибитэ. Үлэлэрин сүрүн соруга- норуот хаһаайыстыбатын бары салааларыгар тарҕаммыт үлэ үтүө өрүттэрин, сатабылларын эдэр ыччаттарбытыгар уһуйуу, кэнчээри оҕолорбутугар сахабыт төрүт үгэстэрин үөрэтии, тэнитии, дойдуларын, дьоннорун-сэргэлэрин таптыыр, убаастыыр буола улааталларыгар патриотическай тыыҥҥа иитии буолар. Ол курдук, Сэбиэттэр тэрийэн ыытар Эбээ, Эһээ уруоктара, сахалыы сиэри-туому тутуһуннаран ыытар тэрээһиннэрэ олус сэргэхтик ааһаллар. Маны таһынан Советскай кэм саҕана улууспутугар үлэ бары хайысхаларыгар элбэх ыччаты, үлэҕэ бары сатыбылларыгар уһуйбут наставниктарбытын үйэтитэн “Нам улууһун үтүөҕэ уһуйааччылара” диэн улахан кинигэни оҥорон таһаарбыттара.
Бүгүҥҥү сүбэ мунньахха 2025 сыллаах үлэ былааныгар эбии киллэриилэри ырытыы, Сэбиэт Балаһыанньатын бигэргэтии о.д.а боппуруостары ырытыы буолла. Маны таһынан өбүгэ остуолун оонньууларын киэҥник тарҕатар сыалтан маастар кылаас ыытылынна. Уһуйууну остуол оонньууларыгар Маастарга кандидат Саргылана Афанасьевна Яковлева олус интириэһинэйдик тэрийэн, көрдөрөн, үөрэтэн ыытта. СР спортка уонна физическай культураҕа министерствота таһаарбыт Хабылык, хаамыска оонньуутун сүрүн быраабылаларын кинигэтин билиһиннэрдэ.
Түмүгэр наставниктар уопсай хаартыскаҕа түстүлэр уонна норуот маастара Егор Николаевич Петров оҥорбут хабылык хаамыска набордарын хамаҕатык ыллылар.
