Улуу Кыайыы 80 сылыгар анаммыт Кыайыы Парадыгар Чурапчы көһөрүүтүн көрдөрөр хартыынаҕа Нам улууһун түмэллэрэ, ол курдук, Петр Сивцев аатынан Намнааҕы история уонна этнография түмэлин, кини филиала Илья Егорович Винокуров аатынан Хатын-Арыытааҕы историяны уонна кыраайы үөрэтэр түмэл, Иван Шарапов аатынан Никольскайдааҕы сири туһаныы түмэлин үлэһиттэрэ уонна Нам улууһун культуратын сүрүнньүүр үлэһит кыргыттара көхтөөх кыттыыны ыллылар. Парад режиссера Иван Новиков историяҕа биллэр Чурапчы оройуонун биир ыарахан кэмин — хоту оройуоннарга көһөрүүнү саха дьоно-сэргэтэ умнуо суохтаах, оҕо-аймах билиэхтээх диэн сыалтан бу көстүүнү көрдөрдө. Бары билэрбит курдук, Илья Егорович Винокуров дьаһалынан Чурапчы олохтоохторун дойдуларыгар төттөрү көһөрүү үлэтин ыытар. Манна үксэ тулаайах хаалбыт эдэр дьон, оҕолор хотуттан төннөн иһэннэр, Нам сирин, дьонун-сэргэтин сөбүлээн, хас да ыал олохсуйа хаалбыттара биллэр. Иннэ гынан, парадка бу көстүү улахан биһирэбили ылла.
Парад кэмигэр Чурапчы көһөрүүтүн түгэниттэн Анастасия Заболоцкая түһэриилэрэ