Бүгүн, алтынньы 27 күнүгэр, П.И.Сивцев аатынан история уонна этнография түмэлэ уонна улуустааҕы А.Ф. Шестаков аатынан норуот айымньытын дьиэтэ быйыл республикабытыгар биллэриллибит Культура сылын чэрчитинэн, Т.К. Ядрихинская аатынан кырдьаҕастар олорор дьиэлэрин олохтоохторун уонна чуолаан Эҥсиэли хочотун Культуратын эйгэтигэр кэрэни-үтүөнү тарҕаппыт, кини сайдарыгар дьоһун кылаатын киллэрсибит, бүтүн олоҕун анаабыт, киэн туттар ветераммытын Олесова Александра Иннокентьевнаны эҕэрдэлээн кэллилэр.
Павел Винокуров норуот айымньытын дьиэтин аатыттан олус кэрэ моһуоннаах халадаай уонна түөскэ кэтэр киэргэл бэлэх туттарда. Намнааҕы түмэл киновидеоархивын үлэһитэ Анастасия Заболоцкая Александра Иннокентьевна улууска үлэлиир кэмигэр уһуллан хаалбыт 90-с сыллардааҕы “Эҕэрдэ” трио концерын таҥан илдьэн Киноконцерт көрдөрдө.
Александра Иннокентьевна эдэр сааһын, үөлээннээхтэрин тыыннаах мөссүөннэрин көрөн, культуратын үлэһиттэрэ маннык кэрэ бэлэх оҥорон олус үөрдүбүттэрин, кинини өрүү саныы-махтана сылдьалларыттан истиҥ махталын эттэ. Кырдьаҕастар дьиэлэрин олохтоохторо бииргэ олорор дьүөгэлэрин эдэр сааһын, кини элбэх өрүттээх улахан талаанын көрөн итэҕэйдилэр, сөхтүлэр, улаханнык астыммыттарын уонна махталларын эттилэр.
Александра Иннокентьевна Аан ийэ айылҕа киэркэйэн турар кэмигэр Нам оройуонун 2 Хомустах нэһилиэгэр күн сирин көрбүтэ. 5 саастааҕыттан ыллыырын сөбүлүүрэ. Радиоҕа бэриллэр сахалыы ырыалары истэн үөрэппит ырыаларын ийэтэ үлэлиир тэрилтэтин үлэһиттэрин иннигэр ыллаан чаҕаарытара.
Шура кыра оҕо сааһыгар «Биригэдьиир Марыына” диэн ырыаны олус сөбүлээн ыллыыра, дьонун үөрдэрэ.
1974 с.оскуоланы бүтэрэн баран ССРС культуратын туйгуна Р.Б.Кириллова ыҥырыытынан Намнааҕы культура дьиэтин инструкторынан үлэлии киирбитэ. Бу кэмнэргэ элбэх өрүттээх үлэлэри ыытыспыта. Ол курдук, элбэх ыытыллар мероприятиеларга, фестивалларга, концертарга, сайынын агитбригадаларга үлэни тэрийиигэ кыттыыны ылара. Культура профкомун үлэтигэр дуоһунаһы сүгэрэ.
Александра Иннокентьевнаны ырыаҕа уһуйбут киһинэн буолар культура ветерана, үрдүк категориялаах хормейстер Феодосия Николаевна Лукина. Александра Иннокентьевна хормейстер идэтин таларыгар кини олук уурбута.
1980 сыллаахха Культпросвет училищеҕа үөрэнэ сылдьан училище профкомун председателинэн, культура обкомун чилиэнинэн талыллан үөрэҕин бүтэриэр диэри үлэлээбитэ. Училищены Кыһыл дипломунан бүтэрэн Хамаҕатта культуратын дьиэтин директорынан ананан үлэлээбитэ.
Үлэлиир кэмигэр саҥа формалаах мероприятиелары тэрийэн, оройуоҥҥа ыытыллар социалистическай куоталаһыыларга 1 миэстэни ылан көһөрүллэ сылдьар Кыһыл Знамянан уонна коляскалаах мотоцикл фондатынан наҕараадаламмыта.
Улуу Октябрьскай бырааһынньыктар өрө көтөҕүллүүлээхтик ыытыллаллара. Хамаҕаттаҕа эдэр сааһыгар үчүгэйдик үлэлээбитэ. Андросова Любовь, Анна Захаровна Заровняева, Канаев Вася бааллара.
1 Хомустах кулуубугар эмиэ директорынан үлэлээбитэ, үрдүк ситиһиилэммитэ, “Туйгун үлэлээх коллектив” диэн буолбута. Александра Иннокентьевнаҕа “Сыл бастыҥ үлэһитэ” аат иҥэриллибитэ, эҕэрдэ аадырыһынан, өйдөбүнньүк бэлэҕинэн бэлиэтэммитэ.
А.И. “Эҕэрдэ” вокальнай триоҕа 15 сыл ыллаабыта.
1986 с. Бүтүн Созтааҕы фестиваль лауреата.
1987 с. “Мирный поет о мире” фестиваль дипломана
1987с Красноярскай куоракка Бүтүн Союзтааҕы агитбригадалары зональнай көрүүгэ Лауреат от РС(Я) буолбута.
Александра Иннокентьевна “Коробейники” нуучча народнай ырыатын ансамблын кытта үлэлэһэр.
Александра Иннокентьевна 1998 с. тэрийбит “Кэскил” оҕо-ырыа ансамбла араас конкурстарга кыттар, улууска, республикаҕа киэҥник биллэр. Бу ансамбль тэриллэригэр фонограммаларын Культура дьиэтин звукооператора Сергей Акимбетов Михаил Перетертовтыын оҥорбуттара.
Александра Иннокентьевна таһаарыылаах үлэтин, оҕо-аймаҕы кэрэҕэ угуйарын иһин Нам улууһун мелодистарын түмсүүтэ, Германия, Франция, Польша дойдуларыгар путевка анаабыта. Кини бу Европа сайдыылаах дойдуларыгар баран, сылдьан, көрөн, дуоһуйан кэлбитэ.
Александра Иннокентьевна олус элбэх өрүттээх талааннаах, кини ханнык баҕарар тэрээһин сценарий кыайа тутан суруйар, тамадалыыр да дьоҕурдаах, драматическай артист да талааннаах, киһи аайы бэриллибэт кэрэ куоластаах.