1982 сыллаахха сайын, оройуоҥҥа сүөһү кыһыҥҥы аһылыгын бэлэмнээһин үлэтэ үгэннээн турар кэмигэр, үлэ тэтимин күүһүрдэр сыалтан ССКП Обкомун бюрота уонна Саха АССР министрдарын Совета атырдьах ыйын 20 күнүттэн балаҕан ыйын 10 күнүгэр дылы Ударнай декаданы биллэрбитэ.
Бу кэмҥэ Саха араадьыйатын биир талааннаах журналиһа Елена Андреевна Лебедкина Намҥа тахсан, үлэни-хамнаһы билсэн баран «Нам улууһугар биир үлэ күнэ» диэн радиопередача оҥорон таһаарбыта.
Манна сиилэһи заготовкалыыр биригээдэ салайааччыта Николай Михайлович Кириллин, Хатыҥ-Арыы парткомун Афанасий Кириллович Алексеев, Нам орто оскуолатын физкультураҕа учуутала Степан Гаврильевич Кириллин, Маймаҕа отделениетын биригэдьиирэ Николай Филиппович Собакин, Никольскай товарнай ферматын салайааччыта, чемпион ыанньыксыт Валентина Михайловна Охлопкова, «Эҕэрдэ» Агитбригада концера, Якутмебель Намнааҕы сыаҕын маастара Афанасий Тимофеевич Винокуров, тутааччы Владимир Акимбетов о.д.а. интервьюлара киирбиттэрэ.
Нам улууһугар арадьыйа кэлбитэ 95 сылынан Намнааҕы П.И. Сивцев аатынан түмэл киновидеоархивын салаата нэһилиэнньэҕэ анаан ол радиобиэрии сорох интервьюларыттан уонна оччотооҕу кэм хаартыскаларынан, киинэкадрдарынан таҥан, тилиннэрэн «Нам улууһугар биир үлэ күнэ» диэн документальнай киинэ бэлэх уунна.
Киинэ сүрэхтэниитэ түмэл конференц-саалатыгар буолла. Анастасия Заболоцкая Араадьыйа историятын урукку кэм чахчыларын кэлбит дьоҥҥо-сэргэҕэ арыйан, сэгэтэн кэпсээтэ. Ол кэннэ киинэни көрүү буолла.
Киинэ кэнниттэн кэлбит ыалдьыттартан Нам улууһун депутаттарын Сэбиэтин бэрэссэдээтэлэ Алексей Иванович Винокуров, Валентина Михайловна Охлопкова, Степан Гаврильевич Кириллин оҕолоро, сиэннэрэ, Маймаҕаттан үлэ ветераннара Татьяна Дмитриевна Павлова уонна Татьяна Дмитриевна Колесова уо.д.а. бэйэлэрин санааларын үллэстэн, эҕэрдэ, махтал тылларын эттилэр.
Бу курдук, улуус үлэтин биир хайысхатын үйэтитэн үүнэр көлүөнэҕэ хаалларар сыалтан, Нам улууһугар Араадьыйа 95 сылыгар анаммыт документальнай киинэ кэлбит ыалдьыттар сэҥээриилэрин ылла.