Саха сиригэр Үлэ сылынан бу дьыл сэтинньи 17 күнүгэр П.И. Сивцев аатынан Намнааҕы история уонна этнография түмэлэ уонна Хамаҕатта нэһилиэгиттэн «Түһүлгэ» норуот айымньытын киинэ «Үлэ — дьол доҕуһуола» диэн холбоһуктаах тэрээһиннэрин бэрт киэҥ ис хоһоонноохтук ыыттылар. Ол курдук, «Түһүлгэ» норуот айымньытын киинэ урукку кэмин көрдөрөр «Хамаҕатта – HOLLYWOOD» быыстапкатын түмэл киэҥ саалатыгар туруорда. Быыстапка үөрүүлээх аһыллыытын Намнааҕы түмэл салайааччыта Александр Иванович Копырин иилээн-саҕалаан ыытта. Манна итии-истиҥ эҕэрдэлэр этилиннилэр, урукку кэмнэр ахтылыннылар, итиэннэ көһүппэтэх өттүттэн Голливуд сулустара «Boney M» бөлөх «Daddy Cool» ырыалара пародия быһыытынан ылланна. Салгыы Андрей Слепцов толоруутугар «Хайыһар” (И.Д. Винокуров – Чаҕылҕан тыла, Андрей Костин мелодията) ырыа дьиэрэччи ылланна, биһиги убаастыыр ветераммыт Прокопий Скрябин фортепианоҕа доҕуһуоллаата. Бэлиэтээн эттэххэ, түмэлгэ турар фортепиано Андрей Костин бэйэтэ туттубут мала. Бу фортепианоҕа аатырар «Хайыһар» мелодията айыллан тахсыбыта.
Быыстапка кыһыл лиэнтэтин Хатын-Арыытааҕы И.Е. Винокуров аатынан история уонна этнография түмэлин салайааччыта Афанасий Христофорович Христофоров, «Түһүлгэ» норуот айымньытын киинин салайааччыта Антонина Алексеевна Харитонова, П.И. Сивцев аатынан Намнааҕы история уонна этнография түмэлин быыстапкалыыр саалатын сэбиэдиссэйэ Рустам Леонидович Федоров быстылар. Быыстапка хас биирдии малын туһунан Татьяна Руслановна Уодай ымпыгар-чымпыгар тиийэ кэпсээтэ. Татьяна Руслановна бэйэтэ хас биирдии мал, кумааҕы, таҥас-сап о.д.а. историятын кытта ыкса алтыспыт буолан ис эйгэтин, остуоруйатын эндэппэккэ билэр. Кэлбит, истибит дьон бэрт болҕомтолоохтук, сэҥээрэ иһиттилэр. Ити курдук, «Түһүлгэ»-лэр өр сыллаах үлэлэрин туоһулуур, араас сыллар кэрэ кэрэһиттэрэ буолбут, ууруна сылдьыбыт күндү малларын, кэм туоһуларын, бэйэлэрэ тикпит, кэппит ураты моһуоннаах таҥастарын, олохтоох артыыстар эксклюзивнай көстүүмнэрин о.д.а. үйэтитэр, баай уоппуттарын үллэстэр сыалтан бар дьонугар көрдөрүүгэ таһаардылар. улууспутугар эрэ буолбакка, бүтүн республикаҕа киэҥник аатырар биир бастыҥ үлэлээх
Ити кэннэ «Үрүлүйэр үлэ» диэн ааттаан агит-бригада көрүҥүнэн тэрилтэлэр бэйэ-бэйэлэрин эҕэрдэлэстилэр. Салайааччылар А.И. Копырин, А.А. Харитонова С. Гольдерова- Саргы Куо «Үлэ» туһунан хоһооннорун аахтылар. Холбоһуктаах нүөмэргэ мааны, ураты куоластаах ырыаһыттар Татьяна Гаврильева уонна Андрей Слепцов “Хаһан этэй?” (К. Еремеев тыллара, А. Дунаев мелодията) диэн ырыаны толорон истээччилэри дуоһуттулар. Түмэл аатыттан Вера, Рустам Федоровтар «Арай мин» (Р. Файрушина, Сахамин репердуартарыттан) диэн нарын ырыаны истиҥ иэйиилээхтик толордулар.
Холбоһуктаах тэрээһиҥҥэ «Толкуйдаа. Оонньоо. Кыай» диэн өй-толкуй оонньуутугар икки хамаандаҕа арахсан “илин-кэлин түһүстүлэр”. Түмүккэ эдэр састааптаах “Сулустар” хамаанда кыайыы өрөгөйүн биллэ. “Чорооннор” да киирсэ сатаатылар. Түмүккэ икки тэрилтэ үлэһиттэрэ, ытык-мааны ветераннара төгүрүччү олорон ирэ-хоро кэпсэттилэр, инники былааннарын торумнаатылар.
Ити курдук, П.И. Сивцев аатынан Намнааҕы история уонна этнография түмэлэ уонна «Түһүлгэ» норуот айымньытын киинэ номнуо үгэскэ кубулуйбут тэрээһиннэрэ үөрүү-көтүү аргыстаах түмүктэннэ.
М. Петрова
